دير الزور هنا … ديرالزور
نتفق عالطلعة من قبل أسبوع أو من نص الأسبوع منشان كل عيلة تحضر حالها وتجهز أغراضها
الخميس يبلش كل واحد بمشتراة الأغراض والخضرة واللحمة وبي ناس تجهز الطبخة وخاصة المحشي ينحفر وينحط بالقدرية وبالبراد من الليل
ناس تروح بسيارات خاصة .. والعوائل الكبار أو تجمع العائلة أحياناً يطلع بباص ايجار أو كميون وصينية لأحد الأقارب
طريق الروحة والرجعة أحلى شي بالطلعة .. كلو ضحك واغاني وهوسات
ناس تنزل تباشر بنصب الخيمة اذا بي خيم .. أو تدور على مكان زين يكون بي العشب والذروة
يبلشون البنات بتجهيز الفطور .. وعالاغلب يكون بيض وبطاطا سلق .. وبي ناس تأخذ معاها مقالي جاهزة ومقلية من الليل
بعد الفطور تبلش التمشايات واللعب واغلب الشباب يلعبون طابة وكالعادة النسوان يبلشون بتجهيز وتحضير الغدا وخاصة إذا طبخ لأنه يأخذ وقت إذا عالحطب وإذا مطلعين معاهم غاز يكون الأمر أسهل
الزلم يلمون بعضهم ويطلعون على صلاة الجمعة .. والنسوان تبلش بالتحضير وبس يرجعون يبلشون يشغلون النار منشان تبلش حفلة الشوي
عالمنقل يقعدون الكل.. واحيانا الشوي يخلص عالمنقل ولكن الأكثرية مايخلون احد يمد ايدو الا الكل يجتمعون وياكلون سوا
بعد مايتغدون يرجعون عاللعب أو يعملون جمعة ويبلشون يغنون وعالغالب تكون الموليا حاضرة… وبي أغاني تضحك (ألف بي بوباية .. ) مثلاً
قبل ما تظلم العين يبلشون يلملمون اغراضهم للرجعة ويكون طريق الرجعه عبارة عن طريق أو مشوار من العمر لأنه الضحك والغناء والصياح كلو يصير بالرجعة
الكل تتذكر لما كانت تجي أمطار قوية أو عجاج يوم الجمعة..
أقوى مطرة أجت لما هدّت السيلة وطافت العالم وظلت الناس مضيعة بعضها وتتطمن على بعضها لثاني يوم ..
وغالباً ماينحط النسوان الحق على الحاسدات الحاقدات اللي جلحولهم الطلعة..
ويقولون الجملة المشهورة.. (هالطلعة نفستها فلانة.. تقولن متنفسة بيها حية)
