لعبة الفتوة والحرية.. الصوص وفشتم والأسود سافروا إلى حلب

(الصوص) مالو كار لا بالطابة ولا بالتشجيع ولابالفتوة ولاباليقظة، ولكن نفسو گشرة، وينضحك عليه بكلمتين.
أجاه (الأسود) يوم الاثنين بالليل وانو يقوللو بي شباب مطبقين باص تايطلعون على حلب يحضرون لعبة الفتوة والحرية، حضر حالك وهات 150، تانسجلك معانا.. طالعين أنا و(فشتم) ومعانا شباب مثل السكرة.
ماچذب خبر.. أعطاه المية وخمسين وموعد الطلعة چان بالـ12 بالليل والانطلاق من دوار غسان عبود..
وأجى اليوم الموعود.. أم الصوص وأبوه مو رضيانين على طلعتو بس قاللهم معاي الشباب ودفعتو المصاري ومو حلوة (أنكت) معاهم.. ووافقو .. وودعوه تقول انو رايح عالصين..

الدنبك والرق يرقع عند الدوار والشباب كلها (طافية) طبعاً فشتم والأسود لسه ما أجو .. والصوص قاعد يستناهم على نار وعلى قلبو طبّة.. خاف ينكتون معاه ومايجون. شوي وانهم جيين.. وطلعوا أخذوا مواقعهم بالباص السكانيا، وبلش الدنبك يرقع والروس كلها طالعة توزع تحيات من الشبابيك، لحد ماطلعوا من الدير..
وعالطريق بلشت المزاننه بين الناس القاعدة من قدام والناس القاعدة من ورا وناس تتمصخر على ناس.. والباص تحول إلى (نامورة) لأنه الكل تدخن والشبابيك مسكّرة، وعلى أغاني الحلي .. ومصطفى قمر.. ودوس دوس ياشوفير.. لحد ماوصلوا على مشارف استراحة الطبقة..
هون وقف القايم بالرحلة وقال لأبو الباص صف عاليمين.. وفعلاً صف عاليمين.
بلّش يعطي توجيهات وكأنو (يورغن كلوب) وقام يعطي الخطة للركاب الللي هم مشجعين .. شباب اسع رايحين نوصل على استراحة الطبقة.. نتمنى من الكل الالتزام وعدم (البوق) لأنه احنا بالروحة .. وحتى إذا ماقدرت إلا تبوق حاول انه أبو الاستراحة مايحس بيك.. مابدنا نعمل مشكلة بالاستراحة اسع .. خلوها للرجعة.
وصلوا الاستراحة والركاب التزموا بتعليمات المعلم.. وعدّت سلامات
وصلوا حلب الساعة تقريباً سبعة الصبح.. بوجههم على باب الفرج ناس تشرب چاي ناس تاكل حليب وصمون وناس تشتري كعك .. والموسيقا التصويرية لكل هالأحداث هي صوت الدنبك اللي يرقع ..
راحت المجموعة عالفندق اللي نيزلين بي نادي الفتوة وبلش الدنبك يرقع مع هتافات.. تعا لاعنا يا فلان يافلان.. طبعاً لعيبة الفتوة يطلعون يحيون الجمهور من بلكون الفندق.. وقطّعوا وقت لحد ماصار وقت اللعبة .. وانطلقوا بالباص عالملعب.. والتوجيهات كانت متركزة (إذا صارت مشكلة الكل تطلع باتجاه الباص بسرعة لأنه ماراح يستنون أحد).
لحد الآن أمور الصوص والأسود وفشتم باللوز .. وبلشت اللعبة
بلشت اللعبة والحكم جان بوقتها يكره الفتوة ..
مجرد مانزلوا الفريقين عالملعب بلشت المسبّات والصوص يحاول يهدي العالم وياكل نسخ.. وكل شوي يسأل الأسود شكون النتيجة لحد ما أجى وقت انكسر بي واحد من لعيبة الفتوة بمنطقة الجزاء وماحط الحكم (دوسباه) وانقلبت الدنيا وبلش رقع البراني والبمبات القوية التطقطق وماخلى أحد من عائلة الحكم الكريمة إلا وسبوه.. وهديت العالم بعد ما أجوا لعيبة الفتوة لاعند الجمهور وهدوهم.. وكملوا المباراة وجاب الفتوة كول.. والعالم مكيفة.. وتغني
سلمى ياسلامة .. قولي للكرامة
هذا الفتوة … مع السلامة
بعد نص الشوط الثاني واللعبة من أحلى مايكون، وطب وجاب الحرية كول… يعني أمر طبيعي فريق قام يلعب وجاب كول.. بس اللي صار انه بلش الجمهور يسب ويلعن ويضرب وهون بلشت الشرطة تتدخل وبلشت العالم تفقس واللعبة شغالة.
الصوص يدحق حواليه.. يدور عالأسود وفشتم مالقى إلا اليعفطلو.. وشدها ركضة تايدور عليهم.. وتذكر كلام (المعلم) بس تصير كونة الكل عالباص.. وركض عالباص..لقى فشتم والأسود موقفين مايفعلون يطلعون يستنون الصوص.. وصلهم وهو يسب وهم يسبون .. وطلعوا بالباص وشخط.. العبارة الوحيدة اللي سمعها ( شد شد قبل ماتجي الحكومة) فعلا الباص بعّد عن الملعب وصار يفوت بحارات ضمن حلب.. والصوص والأسود وفشتم قاعدين باللوج.. فجأة الباص شخط فريم ونزلوا خمس شباب يركضون والموقف مبهم للي قاعدين باللوج.. طلعوا شييفين دجاجة بوحدة من الخرابات اللي مروا بيها.. وبلشت عملية مطاردة للدجاجة.. وماأفلحت محاولاتهم بالقبض عليها.. وطلعوا وكمل الباص مسيرتو ونفس اللي صار بالروحة وقف الباص قبل استراحة الطبقة.. ووقف المعلم وأعطى التوجيهات قال (شباب خفوا ايدكم وعالسريع) والكل فهم .. إلا الصوص المصخم لأنه مايعرف شكون راح يصير.
وقف الباص باستراحة الطبقة.. ونزلو الشباب هذا المطق لفة كباب وهذا المطق لفة بيض ثلاثية الأرغفة وفجأة وبدون سابق إنذار علقت كون وبلش مطق الكراسي مايسوى فرنك
المهم الصوص برا قام يشرب جاي وياكل بسكويت وبلشت المخابطة وهو برا سيرد.. ماحس ودرا إلا الباص تبعهم تحرك بسرعه 1800 كيلو متر بالساعه .. ومتخ وراه يركض ويصفرلهم تايوقفون.. المهم فشتم والأسود خلوا الباص يوقف وطلع الصوص والباص مسرع والجملة اللي سمعها الصوص (دوس قبل ماتجي الحكومة) وفجأة بلشت العالم تفت باكيات عالركاب وناس توزع بسكويت وحس الصوص بأنه الباص صار بي ازدهار اقتصادي فجأة لأنه الكل صارت تدخن مالبورو.. وكنت .. عكس الطلعة الي كانت العالم تدخن بيها حمراء وشام.. هون فهم الصوص انه الاستراحة انباقت .. والشباب اللي مثل السكرة باقوها.
وصلوا الدير.. وقال الصوص العبارة اللي يقولها كلما يطلع طلعة مع الأسود (عطبة إذا أطلع معاكم النوب)
منو من جمهور الفتوة كان شاهد على أحداث شبيهة بهاي؟

#هنا_ديرالزور

 

شاهد أيضاً

رحلة مدرسية ديرية.. (الرواية كاملة)

  بأشهر الربيع تشتغل رحلات المدارس بديرالزور. طبعا يختلف المكان حسب المرحلة العمرية يعني اذا …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *