—
صوت كرنك صلاح معبي الجرية وهو يحمي بيه ويدعس مازوت… من شهر جفتم المحرك ودهنم الكرنك ونفضوه من برى ومن جوى.. ..
اخيراً طلع صلاح وطبكَ باب الكرنك بيدو طرمز جاي وعلبة مي… غسل كاسة وعباها وحطها جدامو… يدخن اجنبي بس حالياً الدخان الاجنبي مو متوفر… وصار يدخن وطني…
عر شريط الزمور وانطلق…
صور محمود انور وحاتم العراقي وسبلكان وكسندرة ماليات الكرنك.. وعناكَيد العنب من كل مكان طالعات.. تقول جاعد جوى عريشة… والبردات لونهن احمر.. وجدام عالمحرك صوف طلي والتابلو جلد اسود… وقلوب حب واسهم فايتات بالقلب (ومجروحين) (ومسافرين) معبية البلور
المسجلة فوق صلاح وحاط شريط لسعد الحلي ( يامدلولة شباجي بالعمر غير الالم والحسرة ولاساعة من الحسرات نخلى.. انا مثل الالى بالشام نخلة الزرع لي والثمر للغير )
صلاح جان يريد وحدة من قرايبو سكن الشام وجوزوها اهلها على واحد من درعا…
صلاح : وخر فروتك عن جدامي.. عليش حاطها عالتابلو ماني شايف شي جدامي ..الدنيا ضباب
ابو جاسم :شمضايكَك من فروتي شايلها على ظهرك اذنها عالتابلو!!
صلاح : ياابو جاسم عيوني يسوربن.. وهذا الدخان الوطني دوخني… وخايف اخربط بين فروتك وحدا الركاب الواكَفين عالدرب وانطحو…او اسوي حادث
ابو جاسم : صل عالنبي شجاب فروتي للآدمي..الراكب بكَد البعير وفروتي هذيانها جدامك…
صلاح : شيلها من جدامي وحطها على رجلينك..
ابو حسين ماخذ تنكة سمنة لمساعد علوي تايسوي واسطة لابنو ينقلو يخدم بالدير
ابو جاسم : جواي بي تنكة سمن مااكَدر احرك حالي…
صلاح :لاحول ولاقوة الا بالله….ويدمدم لحالو لعمى عالنفسيات الجكَم ماتقدر تسولف مع الواحد احس حالي شفير سفينة التايتنك وشايل معاي رجال الاعمال والاغنياء والذهب ورايح بيهم على امريكا…
ام حسين ملطمة بمحرمة سودة ومو مبينات بس عيونها…. ولابسة فوكَ المحرمة هباري وطارف من كَذلها من عند اذنها طالعات وعليهن اثر حنة حمرة…
ام حسين جاعدة بسدابو جاسم.. مرة كَوية محدرة على بيت ابنها خالد سكن جديد بالبلد وعاف الجرية .. .. كل الليل جناين أم حسين ( تحالف قوى الشر) يحشن براس أم حسين علي مرت خالد…
مرت حسين : والله ياعمتي من وكَت جتنا ولفت عالبيت ماشفنا الخير ماتذكرين وكَت العرس يومن انكسرت رجل عمي ابو حسين وماتت بنفس اليوم بقرة الخلف ( شدخل بقرة الخلف بالموضوع).. ومرضت سعاد وضاع منجل العادل…
ام حسين : لاحول ولاقوة الا بالله…تراج بهضتيني انتي ليش ماتسكتين..
مرت حسين : زعم اذا سكتت تصير مرت خالد زينة.. وهاي راح احط بأثمي…… وأسكت تااشوف طيبة قلبج ياعمتي وين توصلنا..
سعاد مرت عدنان : يرضيج ياعمتي صارلنا شهر من الشوندر عالقطن ومدشرين عجيانا بالدروب.. وحضرتها مجلوخة جوى مكيف ولا سألت عنكم صارلها شهرين…
ام حسين تعر سكارة حمرة قصيرة من باكيتها وتشعلها… وتنفخ..
فوزة مرت صالح : شكَد قلتلج ياعمتي هاي مايمشي حالها معانا باجر تبعد خالد عنكم وردتكم تاخذون لخالد اختي سهام بس ماسمعتوا كلامي هاي عافتكم وراحت…
ام حسين : روحن جيبن جاي والله باجر محدرة على خالد وألعن ابوجن وابوها….
عالمحرك جاعد فواز.. لابس قميص عريض وجواه كنزة خنق.. وفوقو سترة صفرة وبنطرون كونز عريض وصباط ابيض مابي تجانس بالالوان ومربي غرة طويلة من الشمس صايرة صفرة وساحبها ليجدام… وكل مايسحب صلاح الغيار لي ورى يلخ فواز على صفحتو.. ويتفل صلاح ويسب عالغيار واللي اخترع الغيارات والكرانك…
أول كرسي فرداوي من عند الباب جاعد ( رزاكَ) وحاط جوى الكرسي كريك وسطل نايلون وبيه كفوف ثخان ..
يشتغل عند متعهد … رزاكَ لابس بدلة جيش خضرة تبع دورات الاغرار ومن كثر مايغسلها.. السترة مثل اللابس بدلة نوم وليد زغير وردانها لكوع ايدو والبنطرون صاير بنتكور فوق الجرابات.. بس هي للشغل للشغل..
براسو لاف يشمر وفوكَ اليشمر طاقية صوف.. وصاد عالشباك ويفكر يدفع سقوط الشبابيك والبوب الركبهن…
الكرسي المجوز ورى الشفير…. جاعد أبو سليمان لابس بدن رمادي.. سترة وكلابية مشرحة من جوى وجيبها على جنب ومحرمة بيضة وعكَال وشواربو حالقهن ومطلع طارف من غرتو من جوى المحرمة معبي هدومو عطر ولابس قندرة حمرة وطارف قندرتو على المحرك بوجوه العالم .. جاعد لحالو بالكرسي حاط بسدو زرف بي وراق ( عالاغلب الاوراق بيهن كَلاجة.. تقرير.. ) عالاساس حاجز الكرسي مايريد حدى من ( الحوش) الرعية يصير بسدو.. رايح على فرع الحزب..
ابو سليمان عندو سيارة وبالعادة مايطلع بالكرنك.. بس اضطر سيارتو خربانة…
الكرسي المجوز ورى ابو سليمان… جاعدين حسين العبد الله وسعيد الاسماعين..
سعيد يصلح مطورات المي… محدرين عالصناعة هو وحسين العبدالله ومعاهم جيس خام ابيض بي قطع من مطور المي.. شي يعتاز شغل بالمخرطة وشي تبديل…
حسين وسعيد يتسولفون… سعيد يقول لحسين : انو مي الفرا انقصت وظل المحرك يدور عالفاضي وهذا سبب عطل المحرك…
حسين مو قنعان ويقول لسعيد : لا والله هذا الواطي نجم ( ابن حسين) دشر المطور شغال وعبر عالجزيرة ينطل دبشي وماقاس الزيت…
ابو سليمان مزعوج من حديث سعيد وحسين وكل شوي يقلهم وطم حسكم صرعتونا انتو والمطورات…
ابو سليمان يحس مستوى مواضيع الشعب (الهردبشت) حواليه هابط….طبعاً ابو سليمان ركب صحن ديجتل صارلو شهرين..
الكرسي الثالث مجوز بعد حسين وسعيد جاعدين ابو سامر ومحمود ..
ابو سامر مساعد بالجيش الشعبي ومحمود رقيب بمستودع الاسلحة يتسولفون بصوت واطي ومدنجرين وروسهم عند بعضهم..
محمود يقول لابو سامر : ابن الكلب معد يفارجنا هالنهار جابص بخلقتنا قطع رزقنا الله لايوفقو.. يتسولفون عن اجازة للعميد يروح على اختو بالقامشلي ( الظاهر عندهم غزوة بالمستودع)..
باللوج جاعدة ام عامر وبنتها فوزة… رايحات عالدكتور.. ام عامر عندها مراجعة للدكتور..
بسد ام عامر جاعدة زريفة محدرة جدرية خاثر بالبوكاج …
بالكَرنة جاعدة مرت جميل ومعاها ابنها الزغير وبيدها محرمة كل شوي تمسح دموعها وخشتها.. وشايلة صرة بيدها… اهلها من الخط الغربي… يمكنها حردانة ورايحة لاهلها تنزل بالكراج وتطلع بكرانك الخط الغربي…
بالكرسي المفرد بعد رزاكَ جاعد ابو عواد ويعر بشواربو… رايح يشوف شريكو بالمكبس ابو جمعة متواعدين بسوق الصوف.. ( يجوز يقلبون تجارتهم عالصوف)…
الكرسي اللي بعد ابو عواد جاعد استاذ ( علي) يداوم بمدرسة على خط ابو خشب ….وطاش فلاحة عذي هو ومدير المدرسة… وطلابهم مابي بالمدرسة… استاذ علي والمدير مفيشينهم….
استاذ علي يحلم السنة يجيه موسم حب ويشتري( كيا)و يطز عالتعليم كلو ويدشر الوظيفة من جذلها…
بنص الكرنك واجف فيصل طالب معهد صناعي…. اليوم مزنكَل وراكب بالكرنك.. البارح ربحت بالتركس وجانوا متشارطين على مصاري…. بالعادة فيصل يايتعربش عالسلم من ورى يناطز فوق الكرنك ويحدر قبل الكراج…
فيصل لابس بنطرون ازرق وقميص المعهد بيد كامش الكتب وواحد من الكتب عليه صورة كاظم الساهر.. وبالايد الاخرى يمسد على شعرو ويدحج بطارف عينو على فوزة… وهي تعلص عليه .. فيصل و مربي ذيل وشعرو يلمع ومرتجي على طارف كرسي ابو عواد وكل شوي يدفسو بكوع ايدو ابو عواد….
درب الزفت محفر وقسم منو حفرتو البلدية…. ومن البارح رشوه بمادة سودة مثل الجير مايعة تزلكَح..
صلاح مسرع والمسجلة شغلة.. حسين وسعيد صوتهم عالي والنسوان باللوج يسولفن وابو جاسم مناجر صلاح عالفروة وصوت المحرك… وابو سليمان مو عاجبو شي… وام حسين قلبها شاعل نار بس تاتوصل جنتها غير ماتسحلها ورزاك يفكر بالصبة والجبلة والحصو والجمينتو وفيصل يفكر شلون يزت رقم الهاتف لفوزة.. ومرت جميل خايفة اهلها يرجعونها على جوزها.. سعيد وابو سامر يفكرون بالصفقة.. استاذ علي يحلم ( بالكيا)… وزريفة تفكر خاف حق الخاثر مايكفي الاغراض التريد تجيبهن…
فجأة يقطع تفكيرهم واحلامهم صوت الزمور و الفريمات يشحطن عالدرب وصوت ابو جاسم يارب سترك يارب يارب سترك… الدنيا صارت سودة معد يبين شي…
صلاح سوى حادث…. بس المسجلة ظلت شغالة
صلاح حاط مراية تركتور ومثبتها جدامو بنص الكرنك، شلون مثبتها الله العليم، يتلولح منها مسباح اصفر حباتو كبار..
المرايا تظل تميل، صلاح عدل المرايا تايشوف الركاب، ألقى نظرة الوداع الاخيرة على الركاب..ايدو الثانية عالدركسيون… لابس قندرة برجلينو ساجدها ، وحدة من رجلينو داعس بيها عالمازوت والثانية شالح القندرة من رجلو وقام يفرك بيها من البرد..
صلاح يصيح على مرت جميل : خلي ابنچ يفوت ايدو من البلور مو ناگصين مصايب.. احسن ماأحدرچ انتي وياه هين
مرت جميل: فوت ايدك لاترزلنا مع صلاح.. هذا ملطلط ومايتشيم.. يحدرنا هين ونصير فرجة للعالم….
صلاح انتبه لحركات فيصل وشاف بيدو شغلة وشلون يدحگ على فوزة وكل شوي يسوي جولة تفقد عليهم…
صلاح موزع اهتمامو على فيصل ومرت جميل وفروة ابو جاسم وبين كاسة الچاي وسكارتو والمسجلة والدرب….
تجي سيارة هونداي مجبلة شايلة خزانة خشب واغراض عاروس وبسرعة تلف عالجنب الثاني جدام كرنك صلاح..
صلاح عيونو جانت طايرة على فيصل وفوزة وفروة ابو جاسم ماخذة تركيزو وصارت بين عيونو، تبلهث صلاح ومعد يعرف شيسوي، لف بسرعة عاليمين منشان مايكفخ الهونداية…. بس مازبطت معاه والمصايب جت دفعة وحدة….
عاليمين بي مفرق تجي طريزيلة شايلة عاملات وشفير الطريزيلة ملثم ومسرع…
تفاجئ صلاح بالطريزيلة…. كبس فريم… بس الدولاليب زحطن.. الدرب مرشوش زفت…. ويكمل الكرنك برى الطريق… هاي چانت اسلم طريقة لصلاح لتفادي اكبر الاضرار….
اقصى اليمين بي بيوت واحد من اهل البيوت عندهم عرس وذابحين للعزيمة وجايبتلهم الهونداية خزانة…
بي وادم واجفين جدام البيوت من اهل العرس … شباب كامشين منشار ويگصون سجر يابس …
على يسار البيوت.. بي حوض مي چبير مسوينو مسمكة… بنيات ونسوان ينظفن المصارين والچرش على طارف المسمكة..
عزبات ملثمات يمرن شايلات حطب ..
نواف اخو العريس معلچ تريلة وجعد يرجع بالتركتور تايصف التريلة على طارف المسمكة…
التريلة معبية صياني وجدور تانظفونهن…
ابو نواف يصيح عليه : يول خلصنا شجعد تصف بقاطرة…. اللحم مكوم بالبرندة وانت لسعك تروح وترجع خلص صف خلهن يغسلن المواعين..
نواف انزعج من ابوه جدام البنيات يحچي عليه… راح يلف من غير جهة… ردة فعل جدام البنوات…
بجيت كرنك صلاح طافخ من الدرب مسيس عالمسمكة…
شفير الهونداية شاف انو الاسلم يلف عالمسمكة احسن مايصفگو الكرنك…
شفير الطريزيلة وهو الحلقة الاضعف بين الكل.. مباشرة لف بزرع و زت حالو ودشر الطريزيلة والعاملات يروحن الى مصيرهن المجهول ومثواهن الاخير بالمسمكة…
النسوان عالمسمكة وگف الدم بعروگهن ويستنن لحظة اصطدام مذنب هالي ( صلاح) بالمسمكة او التركتور او الطريزيلة…
ركاب الكرنك…. بينهم وبين الموت لحظات..
أبو سليمان لابس بدن وشايل زرف مليان تقارير رايح يوصلهن للجهات المختصة لاجت روحو.. صار يتخيل بدال البدن اللابسو چفن ابيض والتقارير البزرف يكمشهن ملك الموت وتعال تبرر واچذب…
وبعدها سؤال الملكان : من هو ربك؟ وماهو دينك؟ ومن هو نبيك؟
ابو سليمان من كثر مو منافق وشگد ماصفگ وطلع مسيرات خايف يخربط بالجواب….
أبو جاسم يدحچ على صلاح واستذنب يگقول بگلبو ( ياريتني ماحطيت الفروة عالتابلو) وقرر بهاي اللحظة يشيل الفروة….
صلاح : صلاح يزج على ابو جاسم… دشر الخرية بمكانها خلينا نشوف جدامنا… من الصبح واحنا نعلك عالفروة… بشرفي ياابو جاسم اذا متت غير مااوگف عالسراط مشان انت وفروتك…
ابو جاسم مو شايل هم بس حگ تنكة السمنة خاف يموت ومايوفي حگها خذاها دين…
أبو سامر ومحمود مكمشين بعضهم صاروايفكرون( الاعمال بالنيات) لعمى اذا متنا تنحسب علينا نطلة وبوگة المستودع واحنا لسعنا جربانين.. يعني عشنا فقراء ولمن فكرنا نبوگ ونصير اغنياء راح نموت…..
حسين العبدالله يگول : بس لو مصلحين المطور وراشين الزرع ومسجين المية الرابعة وبعدها نموت شعليه ….
استاذ علي يفكر :معقولة مصاريي چانت حرام… اقبض رواتب ومااداوم وطلابي ماشافوا شكل المدرسة… الله لايسامحك ياابو سامي ( مدير المدرسة) كلها منك..
فيصل ماجت على بالو بس لعبت التركس.. لسع البارح اول مرة يربح بالتركس وياخذ الشرط… اولي ربعو يظل يجحفون بيه ويخسرونو
زريفة تفكر بجدرية الخاثر..
رزاگ مو فارقة معاه… اكيد الجنة أو النار احسن من شغل الباطون والصب وجبلات الحصو…
صلاح مسكين لسع ماتهنى بالكرنك وشاف خيرو بعد التجفيت.. وخطرت على بالو سوالف المعلمات وتاريخو الحافل معاهن…وصار يفكر بالتوبة قبل الموت قول لحالو : عالاقل لو مشغل قرآن الواحد يلاگي شي جدامو يتحجج بيه…… بس فروة ابو جاسم والطريزيلة صارت بينو وبين التوبة…
خيم الصمت لحظات…. بعدها صار الصياح…
الكرنك والطريزيلة والهونداية كلهم جطم حوالي المسمكة…..
ركضت العالم الواجفين عند الدور عليهم..
فيصل چان الاسرع وطلع من الكرنك وصار يطلع بالعالم…
المسمكة طافت ملوخية وتنكت السمن تبع ابو جاسم تكبت وحولت المسمكة الى دهن وطايف… سحاحير واغراض العاروس والخزانة تكسرت وكلهن طايفات… والعاملات والجداري…
فيصل عر باب من الخزانة وسحب ام عامر وفوزة عليه…
ابو جاسم مفشوخ بكريك رزاگ…
ابو سليمان عروه من شباك الكرنك تكشمن هدومو وطلع بطرگ السروال وراح البدن والمحرمة والعگال .. مكسورة رجلو بچوال حسين العبدالله تبع اغراض المطور …
ابو سامر ومحمود بنص المسمكة يرجفون من البرد ومحد منتبه عليهم…..ابو سامر يگول لمحمود : الحمد لله يمكنا خذينا حسابنا بالدنيا…
نواف التقط انفاسو اخيراً بعد ما زت حالو من التركتور وصف التريلة… وصار يحمل بالعالم تايسعفهم….
#منقول_من_صفحة_الكاتب_معن_الصالح
دير الزور هنا … ديرالزور
